WAMA yaisaidia vifaa vya hospitali Zahanati ya Kitunda, Wilaya ya Ilala Dar es Salaam, Aprili 28, 2010

Na Philomena Marijani

Taasisi ya WAMA imetoa msaada wa vifaa kwa hospitali ya Kitunda, iliyopo wilaya ya Ilala Mkoani Dar es Salaam. Vifaa hivyo vilikabidhiwa na Mwenyekiti wa WAMA Mhe. Mama Salma Kikwete kwa Mganga Mfawidhi wa Zahanati ya Kitunda ,Bi. Judith Philip. Vifaa vilivyokabidhiwa ni Vitanda vya hospitali (Hospital Beds) 02, Magodoro (Mattresses) 02, Mashuka (Bedsheets) 04, Kifaa cha kupimia mwenendo wa upumuaji (Stethoscope) 01, Kifaa cha kupimia shinikizo la damu (BP Machine) 01, Kifaa cha kuwekea vifaa vya kujifungulia (Delivery Kit) 01, Mzani wa watoto (Infant Scale) 01.

Katika hotuba yake katika Zahanati ya Kitunda Mama Salma aliomba juhudi iongezwe katika uboreshaji wa afya ya uzazi kwa wasichana na wakinamama pamoja na magonjwa ya Malaria na UKIMWI. Alisema kuwa magonjwa haya bado ni changamoto katika nchi yetu.

WAMA imejiwekea utaratibu wa kutembelea Mikoa yote hapa nchini ili kujionea maendeleo na changamoto ya mikoa hiyo na hatimaye kutoa mchango katika maeneo makuu matatu: uboreshaji afya ya uzazi ikiwemo kupunguza vifo vya akina mama vinavyotokana na uzazi, kuongeza ushawishi katika kuongeza fursa za Elimu kwa watoto wa kike kwa kuzungumzia changamoto za matukio ya utoro na ujauzito kwa Wanafunzi na kuwajengea uwezo Wanawake kiuchumi.

Katika ziara yake ya Wilaya ya Ilala WAMA pia ilitembelea Shule ya Sekondari Jangwani, ambapo Mwenyekiti wa WAMA aliwasisitizia wanafunzi wajitahidi katika masomo yao na wajiepushe na mitego, vishawishi na matendo yanayoweza kuwasababishia matatizo.

“Msikubali vishawishi kwani peremende ya dk si sawa na asali ya maisha. Iweje uridhie kuuharibu muundo/mpango wa maisha yako kwa kitu cha mara moja ? Mnapaswa kuviepuka vishawishi na vitendo vyote vinavyoweza kusababisha kuingia kwenye matatizo. Kumbukeni haya ninayowaasa ili yawasaidie kuepuka vishawishi vya chipsi-kuku, lifti, simu za mkononi mnavyorubuniwa navyo. Vishawishi vya namna hii, havina lolote jema katika kukukomboa msichana kielimu, kijamii na kiuchumi” Alisema Mama Salma

Mama Salma pia alipongeza uongozi wa mkoa wa Dar es Salaam kwa ongezeko la shule za sekondari za serikali na binafsi ambapo katika shule za sekondari za serikali kuna ongezeko la asilimia 84% na shule za sekondari za binafsi kuna ongezeko la asilimia 53% kimkoa.