Mke wa Rais na Mwenyekiti wa WAMA atia fora na kungara katika Mkutano wa Kimataifa wa Wanawake, Beijing – China , Mei 21 2010

Na Gloria Tesha, Beijing

MKE wa Rais, Mama Salma Kikwete ametia fora na kung'ara katika Mkutano wa Kimataifa wa Wanawake unaoendelea mjini hapa kutokana na hotuba yake kugusa maisha ya wanawake kiasi cha kusababisha kila mtu kutaka apige nae picha.

Hali hiyo ilijitokeza mara baada ya kutoa hotuba fupi ya salamu katika ufunguzi wa mkutano huo katika ukumbi wa Great Hall of The People mjini hapa juzi ambapo halfa hiyo ilipofungwa na wageni kuelekezwa ukumbi mwingine wa Banquet kwa ajili ya burudani, alishindwa kutoka moja kwa moja kutokana na watu kumsonga wakitaka kila mmoja kupiga nae picha.

Kazi ilikuwa ngumu kwa maofisa wa usalama na baadhi ya watu waliozungumza na mwandishi wa habari hizi walieleza kuwa, wameguswa na hotuba yake ambayo imekuwa tofauti na hotuba nyingine kutokana na kuzungumza mambo katika hali halisi.

Marilyn Johnson, Makamu wa Rais wa kampuni ya IBM kutoka Marekani, alisema kutokana na hotuba hiyo ya Mama Salma aliyoitoa kwa Kiswahili na kutafririwa wa kiingereza, anatamani kupata mwaliko kuja Tanzania siku moja ili kuona namna Watanzania hasa wanawake wanavyoweza kutumia nafasi ya kuwa na mke wa rais kama huyo, kuinuka kiuchumi.

“Akinialika kupitia taasisi yake (WAMA) nitakuja Tanzania wakati mmoja, nimevutiwa na mazungumzo yake, yamenigusa,” alisema Johnson.

Miongoni mwa wanawake waliogombea nafasi ya kupiga picha na mke wa rais ni kutoka nchini Mongolia ambao walipohojiwa walisema ni mke pekee wa rais wa Afrika, ambaye kupitia taasisi yake, ameonesha kuwajali wanawake na ni mfano wa kuigwa.

Katika hotuba yake mbali na kutaka wanawake wawezeshwe na taasisi za kifedha, pia alitaka mataifa yakubali kuwa mwanamke anaweza, anapowezeshwa na kupewa nafasi hivyo kuyataka yathamini mwanamke.

Mama Salma alisema mwanamke ana majukumu mengi, ni mama, mlezi wa watoto wadogo na mtoto mkubwa (mume) lakini pia ni kiongozi na mzazi.

“Pamoja na yote hayo, mwanamke anaweza kutekeleza majukumu yote anayopewa, haijalishi yote haya, hivyo wanawake wanaweza,” alisistiza Mama Salma na kushangiliwa.

Leo mke wa rais anatarajiwa kutoa mada fupi kuhusu mafanikio ya WAMA na nafasi yake kama mke wa rais (kiongozi) katika kuwasaidia wanawake kabla ya sherehe ya kufunga mkutano.